साइनो समाचारदाता/पथरी, २२ फागुन ,
मोरङको पथरीशनिश्चरे – ७ लामाटोलीमा १५ बर्षिय ज्ञानमति थुलुङ राईको हत्या आरोपमा प्रहरीले एक जनालाई पक्राउ गरेको छ । राईको हत्या आरोपमा मोरङ ग्रामथान गाउँपालिका धिरेन चौधरीलाई पक्राउ गरी अनुसन्धान भैरहेको मोरङ प्रहरीले जानकारी दिएको हो । किशोरीको शव पोस्टमार्टमको लागि धरान स्थित बिपि स्वास्थ्य प्रतिष्ठानमा राखिएको छ शवको पोस्टमार्टम भोली गरिने भएको छ।
उनलाई आजै बेलुकी ५ बजे पत्रकार सम्मेलन मार्फत प्रहरीले सार्वजनीक गर्ने तयारी गरेको छ । ज्ञानमती पथरी शनिश्चरे ७ मा दाजु भाउजु संग बस्दै आएकी थिइन । सुम्निमा होटल संचालन गर्दै आएका मामाको छोरा दाजु विनोद र भाउजु संग २ बर्ष देखि बसेकी हुन । खोटाङको एँसेलुखर्क घर भएकी १५ बर्षकी राई स्थानीय पञ्चायत माध्यमिक विद्यालयको कक्षा ७ मा अध्ययनरत थिइन् ।
राई शौचालय गएको मौका छोपी चोधरीले हत्या गरेको अनुसन्धानमा खुलेको छ । चौधरीलाई सोही रातको २ बजे आसपासमा जिल्ला प्रहरी कार्यालय मोरङका वरिष्ठ प्रहरी उपरीक्षक (एसपी) नवराज कार्की सहितको टोलीले बेलबारी स्थित भाउन्नेको जंगलबाट पक्राउ गरेको हो । घटना स्थलबाट प्रहरीले खुकुरीको दाव, जुत्ता लगायतका सामाग्री बरामत गरेको छ ।
राति करिब साढे १० बजे कोठाबाट शौचालय जाने क्रममा गर्धन सहित शरीरका विभिन्न भागमा धारिलो हतियार प्रहार गरेर हत्या गरिएको मोरङ प्रहरीका प्रवक्ता डिएसपी रञ्जन कुमार दाहालले जनाए । राईको घटना स्थलमै मृत्यु भएको हो । प्रारम्भिक अनुसन्धानका क्रममा प्रेम सम्बन्धमा आएको विवादका कारण हत्या भएको अनुसन्धान अधिकृत बताउँछन् । घटनाको विषयमा सबै कोणबाट अनुसन्धान सुरु गरिएको मोरङ प्रहरीका प्रवक्ता डिएसपी दाहालले जानकारी दिए ।
‘हामीले गहन रूपमा अनुसन्धान सुरु गरेका छौँ । सबै कोणबाट अनुसन्धान थालिएको छ । थप विषय हामी जानकारी दिनेछौँ । अहिले अनुसन्धान भइरहेको छ,’ उनले भने, ‘पत्रकार सम्मेलनमा थप विषयमा जानकारी दिनेछौँ ।’ पक्राउ परेका व्यक्तिलाई इलाका प्रहरी कार्यालय पथरीमा राखी अनुसन्धान भएको अनुसन्धान अधिकृत बताउँछन् । ‘एक जना व्यक्तिलाई नियन्त्रणमा लिएर अनुसन्धान भइरहेको छ । हत्यामा प्रयोग भएको धारिलो हतियार खोजी कार्यमा लागि परेका छौँ,’ घटनाको अनुसन्धान गर्दै आएका ती अधिकृतले भने ।
