‘संविधानमा लेख्दैमा धर्म, संस्कार र संस्कृतिको जगेर्ना हुदैन’ उपसभामुख तुम्बाहाम्फे
साइनो समचारदाता
उर्लाबारी । प्रतिनिधि सभाका उपसभामुख डा. शिवमाया तुम्बाहाम्फेले समाज परिवर्तनका लागि सबै जाति र धर्मबीच सहकार्य आवश्यक रहेकोमा जोड दिएकी छिन् ।
सोमबार मोरङको उर्लाबारी नगरपालिका–३ स्थित धिमाल जातीय विकास केन्द्रले जातिरी÷ सिर्जात समापन तथा साँस्कृतिक कार्यक्रमको अवसरमा बोल्दै उपसभामुख तुम्बाहाम्फेले आफ्नो धर्म संस्कार मात्र होईन अन्य जातिको संस्कार संस्कृतिलाई पनि सम्मान् गर्नुपर्ने जोड दिइन् । उपसभामुख तुम्बाहाम्फेले नेपालको संविधानको मौलिक हकमा सबै धर्म र संस्कारको जगेर्ना गर्नुपर्ने कुरा उल्लेख भएकाले सरकार सबै धर्म र संस्कार संस्कृतिको जगेर्ना र प्रबद्र्धनमा लाग्नुपर्ने बताइन् ।
संबिधानमा उल्लेख हुँदैमा आफ्नो धर्म, संस्कार र संस्कृतिको जगेर्ना नहुने उल्लेख गर्दै उनले सबैले नयाँ पुस्तालाई हस्तान्तरण गर्दै लैजानुपर्ने बताइन् । उर्लाबारी नगरपालिकाका मेयर खड्ग फागोले धिमाल समुदायको विकास र प्रबद्र्धनका लागि नगरपालिका तयार रहेको बताए । उनले आगामी वर्षको बजेटमा समुदायको जगेर्ना र उत्थानका लागि सम्बोधन गर्ने प्रतिबद्धता जनाए । केन्द्रका अध्यक्ष तेजबहादुर धिमालको अध्यक्षतामा भएको कार्यक्रममा धिमाल जातिबाट पहिलो पटक विद्या वारिधि गरेका पथरीशनिश्चरे नगरपालिकाका सोमबहादुर धिमाललगयातलाई सम्मान् गरिएको छ ।
यस्तै धिमाल समुदायबाट खेलकुद, शैक्षिक, कला लगायतका क्षेत्रमा योगदान पुर्याउने एक दर्जन बढीलाई सम्मान् गरिएको थियो । धिमाल जाति पूर्वी नेपालको प्रदेश नंं १ मा बसोबास गर्दै आएको एक प्राचीन आदिवासी हुन् । मुख्य रुपमा झापा मोरङ र सुनसरीमा मोरङमा बस्दै आएका धिमालहरुको जनसंख्या ५० हजार भन्दा बढी धिमाल रहेको संबिधानसभा सदस्य पर्तमान धिमालले बताए । बैशाख २ गतेदेखि असार २ गतेसम्म धिमाल समुदायले पर्व मनाउदै आएका थिए । धिमाल जातिको उद्गमस्थल मानिएको मोरङको लेटाङ नगरपालिकाको भोगटेनीस्थित राजारानीमा मेला लगाएर जात्री पर्व शुरु हुने गर्दछ ।
ग्रामथानमा हाँस कुखुरा, सुँगुरलगायतको बलि दिएर सो पर्व प्रारम्भ गरिन्छ । भोगटेनीबाट शुरु भएपछि धिमाल बस्तीको टोलटोलमा यो पर्व पुग्ने गर्छ । सिर्जात अर्थात् सामूहिक पूजा वा जात्री नयाँ वर्षको पहिलो चाड भएकाले सालभरि कसैलाई पनि रोगब्याधि नलागोस, शोक नपरोस र सुख शान्ति छाओस भनेर मनाइने गरिएको छ । यो पर्वमा धर्म ठाकुर, लक्ष्मी, चौमाझी, बूढा ठाकुरलगायतको पूजा गरिने धिमाल जातीय विकास केन्द्रका महासचिव केदार धिमाल बताए । यो पर्व धिमालका प्रदेश न १ का ९८ वटा भन्दा बढी टोलमा मनाइने गरिएको छ । गाउँगाउँमा मेलाको आयोजना हुने गरेको छ । पर्वको अवसरमा मोरङका उर्लाबारी, पथरीशनिश्चरे बेलबारी नगरपालिका तथा कानेपोखरी गाउँपालिका र झापाको दमक नगरपालिकाले स्थानीय सार्वजनिक विदा समेत दिएका छन् ।